विराटनगर । नेपाल उद्योग वाणिज्य महासंघ कोशी प्रदेशको आयोजनामा विराटनगरमा ढाका कपडा महोत्सव सुरु भएको छ । नेपालको मौलिक संस्कृति, परम्परा र पहिचानसँग जोडिएको ढाका कपडालाई प्रवर्द्धन गर्ने उद्देश्यले बिहीबारदेखि तीनदिने ढाका कपडा महोत्सव सुरु भएको हो ।

महोत्सवको कोशी प्रदेशका मुख्यमन्त्री हिकमतकुमार कार्कीले उद्घाटन गरेका थिए । कार्यक्रममा मुख्यमन्त्री कार्कीले महोत्सवले आर्थिक चलायमान गर्ने बताए । साथै यसले स्थानीय उत्पादनलाई राष्ट्रिय तथा अन्तर्राष्ट्रिय बजारमा पुर्याउन सहयोग गर्ने उल्लेख गरे । पूर्वीय पहिचान झल्काउने ढाकाले नेपाली समाजको हस्तकला, सृजनशीलता, र उद्यमशीलतालाई उजागर गरेको छ । देशभर विभिन्न समुदायहरूमा ढाका कपडा उत्पादनको लामो इतिहास रहेको छ । कोशी प्रदेशको ताप्लेजुङ, पाँचथर, इलाम, धनकुटालगायतका क्षेत्रमा ढाका उद्योग प्रमुखरूपमा विकास भएको ढाका उद्योगीहरूको भनाइ छ ।

नेपाली ढाकाले अन्तर्राष्ट्रिय पहिचान बनाउँदै निर्यातको उच्च सम्भावना बोकेको छ । तर यो व्यवसायलाई अझ परिस्कृत, प्रविधिमैत्री, र व्यावसायिक बनाउन नसक्दा अपेक्षित उपलब्धि हासिल गर्न नसकिएको उद्योग वाणिज्य महासंघ कोशी प्रदेशका अध्यक्ष राजेन्द्र राउतले बताए । नेपाली ढाका कपडाको प्रवर्द्धन, स्थानीय उद्यमीहरूको क्षमता अभिवृद्धि, व्यापारिक सम्भावनाहरूको खोजी तथा नेपाली महिलाहरूलाई उद्यमशीलतामा सशक्त बनाउनका लागि महासंघ कोशी प्रदेशको महिला उद्यमी विकास समितिले कोशी प्रदेशमा नै पहिलो पटक यो महोत्सव लगाउने जमर्को गरेको उनको भनाइ छ । नेपालको संस्कृति र परम्पराको प्रचारप्रसार गर्न विदेशिएका नेपालीलाई विशेष गरेर ढाका कपडाको प्रयोग गर्ने प्रचलन बढाउन अब सरकारले ढिला गर्न नहुने उनले बताए । महोत्सवमा कोशी प्रदेशका उद्यमी व्यसायीहरूले आफ्ना उत्पादनहरूको स्टल राखेका छन् ।

महोत्सवमा ढाका कपडाको व्यावसायिक वातावरण निर्माणको लागि विभिन्न संवाद कार्यक्रमहरू पनि सञ्चालन गरिने जनाइएको छ । उत्पादकदेखि क्रेताबिक्रेता सबैको जमघट हुने थलोमा नेपाली ढाका कपडाको अझ ब्रान्डिङ भएर जाने तयारी गरिएको आयोजकले जनाएको छ । महोत्सवले महिला उद्यमशीलताको सशक्तीकरण भएर लगानी प्रवर्द्धनसँगै भविष्यमा कोशी प्रदेशबाट उत्पादन हुने कपडाले निर्यात क्षेत्रमा अझ बढी योगदान पुर्याउने विश्वास गरिएको छ । ‘नेपाली भेषभूषा हाम्रो बोली, ढाकाको सारी ढाकाकै चोली’ नारासहित ढाका सुुरु भएको महोत्सव विराटनगरको मेनरोडमा रहेको जैनभवनमा जारी छ ।