विराटनगर । मोरङको विराटचोकमा शुक्रबार साँझ कोमात्सु कम्पनीको नयाँ मोडल पीसी २०५–१० एम जिरो एक्स्काभेटर औपचारिक रूपमा सार्वजनिक गरिएको छ। नेपालका लागि कोमात्सु हेभी इक्विप्मेन्टको आधिकारिक बिक्रेता कन्टिनेन्टल ट्रेडिङ इन्टरप्राइजेज प्रालि र राउत कन्ट्रक्सन सर्भिसेज प्रालिले अत्याधुनिक स्याटेलाइट मोनिटरिङ प्रणालीसहितको यो मोडल प्रस्तुत गरेका हुन्।कम्पनीका अनुसार सार्वजनिक गरिएको एक्स्काभेटर इन्धन खपतमा किफायती हुनुका साथै उच्च कार्यक्षमता भएको छ। कन्टिनेन्टल ट्रेडिङ इन्टरप्राइजेज प्रालिका कार्यकारी निर्देशक टंकप्रसाद भट्टका अनुसार यो उपकरण बलियो, कम इन्धन खपत गर्ने र नेपालको विविध भूगोलमा प्रभावकारी रूपमा प्रयोग गर्न सकिनेछ।नयाँ मोडलको एक्स्काभेटर नेपालका निर्माण क्षेत्रका आवश्यकताहरू पूरा गर्न विशेष डिजाइन गरिएको बताइएको छ। सुरुको लागत र सञ्चालन खर्च समेत किफायती रहेको कम्पनीको दाबी छ। पूर्वाधार क्षेत्रमा जुनसुकै भूगोलमा पनि यो उपकरण उपयोगी साबित हुने अपेक्षा गरिएको छ।
कोमात्सु जापानको प्रख्यात हेभी इक्विप्मेन्ट निर्माता कम्पनी हो, जसले दक्षिण एसियाली मुलुकहरूका लागि भारतको चेन्नईमा एसेम्बलिङ प्लान्ट राखेको छ। यसले ढुवानी खर्च कम गर्ने र उपकरणको छिटो डेलिभरी सुनिश्चित गर्ने कम्पनीको भनाइ छ।मुख्य इन्जिन भने मूल कम्पनीबाटै आउने भएकाले गुणस्तरमा समानता रहेको बताइएको छ।
सार्वजनिक गरिएको पीसी २०५–१० एम जिरो मोडलको एक्स्काभेटर नेपाली सडकहरूको औसत क्षमताअनुसार २१ टन तौलको छ, जुन हेभी ड्युटीका विभिन्न काममा प्रयोग गर्न सकिन्छ।मोरङको विराटचोकस्थित होटल नेपालरिकामा आयोजित कार्यक्रममा कन्टिनेन्टल ट्रेडिङ इन्टरप्राइजेज प्रालिका अध्यक्ष सुहृदयराज घिमिरे, राउत कन्ट्रक्सन सर्भिसेज प्रालिका अध्यक्ष राजेन्द्र राउत, कम्पनीका बोर्ड अफ डाइरेक्टरहरू तथा पूर्वाधार तथा निर्माण क्षेत्रमा संलग्न व्यवसायीहरूको उपस्थिति थियो।हेभी इक्विप्मेन्ट क्षेत्रमा कोशी तथा मधेस प्रदेशमा स्थापित राउत कन्ट्रक्सन सर्भिसेज प्रालि २१ वर्षदेखि कोमात्सु कम्पनीका उपकरणहरूको बिक्री तथा सर्भिसिङ सेवा प्रदान गर्दै आएको छ।
साथै, कम्पनीले मागअनुसार मेसिनहरूको भाडामा उपलब्ध गराउने सेवा पनि दिँदै आएको छ।