विराटनगर । विराटनगरमा सञ्चालन भएको ढाका कपडा महोत्सवमा ५५ लाख रुपैयाँबराबरको कारोबार भएको छ । विराटनगरको जैन भवनमा चैत ७ गतेदेखि ९ गतेसम्म नेपाल उद्योग वाणिज्य महासंघ कोशी प्रदेशको महिला उद्यमी विकास समितिले महोत्सव आयोजना गरेको थियो ।

महोत्सवमा कोशी प्रदेशमा रहेका ढाका उद्यमीहरुको उत्पादनलाई प्रदर्शनीमा राखिएको थियो । विदेशी पहिरनमा रमाउने नेपाली समुुदायलाई ढाका कपडा महोत्सवले आकर्षित गर्न सफल भएकोले व्यावसायिक कारोबार समेत उत्साहजनक रहेको महासंघ कोशीका अध्यक्ष राजेन्द्र राउतले जानकारी दिए । महोत्सवमा ढाका कपडाले हाम्रो समाजको हस्तकला र उद्यमशीलतालाई राम्रोसँग उजागर गरेको देखिएको उनले बताए । महोत्सवले विराटनगरका विभिन्न समुदायहरूमा ढाका कपडा उत्पादनको इतिहासका बारेमा जान्ने उत्साह बढेको पनि जनाइएको छ ।

कोशी प्रदेशको ताप्लेजुङ र पाँचथरलगायतका क्षेत्रमा ढाका उद्योग प्रमुखरूपमा विकास भएको महोत्सवमा ताप्लेजुङ्गबाट ढाका कपडाको स्टल सञ्चालन गर्न आएकी व्यवसायी रिना राईले बताइन् । महोत्सवले यो व्यवसायलाई अझ परिस्कृत, प्रविधिमैत्री र व्यावसायिक बनाउन सकेमा अपेक्षित उपलब्धि हासिल गर्न सकिने कुराको अनुभव गराएको उनको भनाइ छ । महासंघ कोशी प्रदेशको महिला उद्यमी विकास समितिले कोशी प्रदेशमा पहिलो पटक यस्तो महोत्सव गरेको हो । महोत्सवमा तेहथुम जिल्लाबाट सहभागी हुन आएकी ढाका कपडा उद्यमीलाई नगदसहित प्रमाणपत्रबाट सम्मान समेत गरिएको थियो ।