विराटनगर । सुनसरी मोरङ औद्योगिक कोरिडोरका उद्योगी मोतीलाल दुगडले विराटनगरको चर्चित सेन्चुरी सपिङ महल बिक्री गरेका छन् । उद्योगपति दुगडले निर्माण सुरु गरेको करिब १० वर्षभन्दा बढी समय बित्दा समेत सेन्चुरी महल हालसम्म पनि निर्माणाधीन अवस्थामा नै रहेको छ ।
उद्योगी दुगडको पारिवारिक अंशवण्डा भएपछि उनको भागमा सेन्चुरी महल आएको थियो । अत्यधिक ऋणका कारण बैंकको कालोसूचीमा पर्ने अवस्थामा आएपछि दुगडले एक अर्ब ५५ करोड रुपैयाँ बराबरको मूल्यमा सेन्चुरी महल नै बिक्री गरेका हुन् । उनले गत वर्ष मात्रै सुनसरी मोरङ औद्योगिक कोरिडोरमा रहेको दुगड स्पाइसेज एन्ड फुड प्रोडक्ट कम्पनीको २५ प्रतिशत सेयर ७५ करोड रुपैयाँमा भारतीय डोल्मा कम्पनीलाई बिक्री गरेका थिए । हालै उद्योगी दुगडले एक बिगा चार कठ्ठा जमीनसहित उक्त जमीनमा निर्माणाधीन सेन्चुरी महल नै भाटभटेनी सुपर मार्केटका सञ्चालक मीनबहादुुर गुरुङलाई बेचेका हुन् । एक अर्ब ५५ करोडमा रुपैयाँमा आफूले सो महल किनेको भाटभटेनी सुपरमार्केटका सञ्चालक मीनबहादुर गुरुङले जानकारी दिए ।
उद्योगी मोतीलाल दुुगडसँग सबै लेनदेनका कुुरा मिलिसकेको र अब मालपोतमा गएर जग्गा र घर नामसारी गर्न मात्रै बाँकी रहेको गुुरुङले बताए । सेन्चुरी महल बिक्री भइसकेपछि अब उद्योगी दुुगडको पूर्ण स्वामित्वमा होटल हैरिसन प्यालेस प्रालि भ्याट नम्बर ६०२४६०९९८, एसिया केम प्रालि भ्याट नम्बर ६०९५८४८१३ र एसिया केमिकल कम्पनी प्रालि ३००१००३२७ मात्रै कम्पनी रहने छ । त्यसमा पनि १५ दिनको हदम्याद दिएर आन्तरिक राजस्व कार्यालयबाट मुअकर र आयकरबापतको ठूलै रकम बक्यौता तिर्न बाँकी रहेको सार्वजनिक भएको छ । उद्योगी दुुगडले गत वर्ष दुगड स्पाइसेज एन्ड फुड प्रोडक्टको २५ प्रतिशत सेयर बिक्री गरी लामो समयदेखि बाँकी रहेका केही कम्पनीको राजस्व बक्यौता फस्छ्र्योट गरेका थिए । त्यसबेला पनि उद्योगी दुगडले होटल हैरिसन प्यालेस प्रालिको राजस्व बक्यौता फस्र्योट नगरी बक्यौता नै राखेको व्यवसायी स्रोतको दाबी छ ।
आर्थिकरूपमा विस्तारैविस्तारै ओरालो लाग्दै गएका उनी प्रधानमन्त्री केपी शर्मा ओलीको पार्टी नेकपा(एमाले)मा को उद्योग विभाग प्रमुख छन् । प्रधानमन्त्रीसँगको निकटताका कारण उद्योगी दुगडको रवाफ भने बजारमा निकै नै रहेको स्थानीय उद्योगी तथा व्यवसायीको भनाइ छ । आफ्नो साख बचाउनका लागि उनले पछिल्लो समय बाध्य भएर सेन्चुरी महल नै बिक्री गरेको दाबी गर्न थालिएको छ ।