काठमाडौं । दृष्टि मिडियाको नामका केही व्यक्तिले नक्कली कागजपत्र बनाइ अष्ट्रेलियाका लागि भिषा अप्लाई गरेको पाइएको छ । दृष्टि मिडिया प्रालिद्वारा सञ्चालित अनलाइन पोर्टल दृष्टिन्युजको परिचय पत्र , वर्किङ एक्सपियरेन्स लेटर लगायतका नक्कली कागजपत्र बनाई अष्ट्रेलियाका लागि भिषा अप्लाई गरिएको पाइएको हो ।
भारतको नयाँदिल्लीस्थित अष्ट्रेलियन उच्च आयोगले जानकारी गराएअनुसार बाग्लुङका कृष्ण भण्डारी, पर्वतका नामबहादुर पुन, धादिङका सुरेन्द्र तामाङ र बाग्लुङकै थम प्रकाश छन्त्यालले दृष्टिन्युजको परिचयपत्र लगायतका कागज पत्र पेश गरी भिषा अप्लाई गरेको पाइएको हो ।
उनीहरुले अप्लाई गरेको कागजपत्र अष्ट्रेलियन उच्च आयोग नयाँदिल्लीले दृष्टि मिडियालाई उपलब्ध गराएको छ । ती फेक कागजपत्र ‘भेरीफाई गरिदिन’ भन्दै अष्ट्रेलियन उच्च आयोगले दृष्टि मिडियालाई उपलब्ध गराएको हो । जसमा उनीहरुले सम्पादक, रिपोर्टर, क्यामेरामेन लगायतको आफूखुसी दर्जा दिएका छन् भने ती कागजपत्रमा दृष्टि मिडियाको छाप र हस्ताक्षर नक्कली गरिएको छ ।
ती कागजपत्र सरकारी लोगोसमेत प्रयोग गरिएको छ । नब्बे हजारदेखि एक लाख पाँच हजार रुपैयाँसम्म तलव लिएको कागज पत्र उनीहरुले पेश गरेका छन् ।
यसअघि पनि केही व्यक्तिबाट दृष्टिको नाममा ठगी गर्ने प्रयासहरु नभएको होइन । तर, यसपटक एकैसाथ चार जनाले दृष्टिको नक्कली कागजपत्र बनाइ अष्ट्रेलियाका लागि भिषा अप्लाई गरेको पाइएको हो ।
यस विषयमा दृष्टि मिडियाले प्रेसकाउन्सिलमार्फत् सीआईबीमा छानबीन गर्न अनुरोध गर्ने भएको बताइएको छ ।