विराटनगर । विराटनगरमा आज सोमबारदेखि दुई दिने महानगर रोजगार मेला सुरु भएको छ । महानगरमा रहेका बेरोजगार युवाहरुलाई केहि हदसम्म रोजगारी प्रदान गर्नका साथै वैदेशिक पलायनलाई केहीपनि रोक्नको लागि उक्त मेलाको आयोजना गरिएको हो । विराटनगर महानगरपालिकाका मेयर नागेश कोइरालाले ३ सय जना भन्दा बढी बेरोजगार युवा युवतीलाई रोजगार उपलब्ध गराउने गरी महानगर रोजगार मेलाको आयोजना गरिएको बताएका छन्।

मेयर कोइरालाले २०८० सालमा आयोजना गरिएको पहिलो महानगर रोजगार मेलाबाट १ सय ९७ जना युवा युवतीलाई रोजगार उपलब्ध गराइएको बताए ।

महानगर रोजगार मेलामा विराटनगर महानगरपालिकाका प्रमुख प्रशासकीय अधिकृत राजेन्द्र पराजुली सहित महानगर पालिकाका वडा अध्यक्ष र कर्मचारीहरूको उपस्थित रहेको थियो । विराटनगर महानगरपालिकाले वडा नं. ७ स्थित विरेन्द्र सभा गृहको दक्षिण तर्फ इको पार्कमा महानगर रोजगार मेलाको आयोजना गरिएको छ । जहाँ ३० भन्दा बढी स्टलबाट बेरोजगार युवा युवतीलाई चाहिएको रोजगारको बारेमा फारम भर्ने काम भइरहेको छ ।आयोजना गरिएको रोजगार मेलाको मंगलबार समापन हुनेछ ।