सडक दुर्घटनामा मोरङको ग्रामथान गाउँपालिकाका सब इन्जिनियरको मृत्यु भएको छ । मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार दुर्घटनामा गाउँपालिकाका ओभरसियर ३५ वर्षीय मोहम्मद मुक्तार खानको मृत्यु भएको हो ।
सप्तरी घर भएका खान विराटनगर महानगरपालिका–१ मा डेरा बस्दै आएका थिए । उनले चलाएको को १ ब १३८४ नम्बरको सरकारी मोटरसाइकल विराटचोक–घिनाघाट सडक खण्डअन्तर्गत ग्रामथान–५ तेतरिया चोकमा राति ८ः५० बजेतिर दुर्घटनामा परेको डीएसपी बस्नेतले बताए ।
तेतरिया ग्रामथान गाउँपालिकाको केन्द्र हो । सडकको साइडमा रोकेर राखेको ना ५ ख ७०७९ नम्बरको टिपरको पछाडिको भागमा मोटरसाइकल ठोक्किएर दुर्घटना भएको प्रहरीले जनाएको छ । हरैँचाबाट विराटनगरतर्फ आउँदै गरेको मोटरसाइकल दुर्घटना हुँदा खान गम्भीर घाइते भएका थिए । उपचारका लागि विराटनगरको आर्या न्युरो अस्पताल पुर्याउनसाथ चिकित्सकले मृत घोषित गरेको जानकारी डीएसपी बस्नेतले दिए ।
शवलाई पोस्टमार्टमका लागि विराटनगरको कोशी अस्पतालमा लगिएको छ । दुर्घटनालगत्तै टिपर र चालक झापाको बिर्तामोड नगरपालिका–२ का ४३ वर्षीय तीर्थराज ठाकुरलाई नियन्त्रणमा लिएर प्रहरीले घटनाको अनुसन्धान सुरु गरेको छ ।
मोटरसाइकल चालकको लापरबाहीका कारण दुर्घटना भएको प्रहरीको प्रारम्भिक अनुमान छ । प्रहरीका अनुसार आफूले चलाइरहेको सवारीसाधनतर्फ चालकले ध्यान केन्द्रित नगर्दा दुर्घटना भएको पाइएको हो ।
विकास निर्माणको काम भइरहेको साइडको अनुगमन गरेर फर्किने क्रममा खान दुर्घटनामा परेको गाउँपालिकाका इन्जिनियर निशुभ लुइँटेलले बताए । ‘साइडमा पुगेर फर्किने क्रममा राति दुर्घटनामा परेको पाइयो,’ उनले भने, ‘गम्भीर घाइते अवस्थामा उद्धार गरेर अस्पताल पुर्याउनसाथ चिकित्सकले मृत घोषित गरेका हुन् ।’